早排同新加坡航空公關飯局傾開近況，講起有次幫一位印度客人安排在A380頭等艙求婚，「話說當日有個印度男乘客打電話嚟訂位，話女朋友由新加坡返香港，想訂兩個頭等位，然後喺機艙求婚，希望我哋可以幫手安排。」聽落以為好簡單，只要喺個位度擺紮花加枝香檳就完成任務？朋友你實在太儍豬啦。
首先，男子Akshay預早一日先飛新加坡，然後，女子Trisha當日手持嘅係經濟客位，航空公司要喺check in嗰陣唔俾Trisha知道佢將會坐頭等，而又避免Akshay check in同登機嗰陣遇見Trisha，再安排喺機艙求婚所需一切，諗起都煩。結果，求婚行動如計劃一樣順利喺機上禮成，我哋訪問咗Akshay同Trisha：
記：為甚麼想到在空中求婚？
Akshay：我好鍾意飛和去旅行，加上我們曾經分隔兩地，Trisha在英國，而我在香港，搭飛機對我們來說別具意義。
記：當日求婚計劃是怎樣的？順利嗎？
Akshay：非常順利，當日航空公司將求婚計劃通知了櫃枱、貴賓室、閘口以至機上的工作人員，我一直在貴賓室內等候，不時有人通知我Trisha的最新位置。直至所有乘客已順利登機，我才坐車直奔閘口登機。起飛後空中服務員在頭等包廂的睡床上布置，然後把經濟艙的Trisha帶到，我才從後出現下跪求婚，最後，她答應了。
記：Trisha，當時感覺如何？
Trisha：當日被帶到頭等艙時，心想以為幸運地被upgrade，直到見到Akshay，即時嚇了一跳，然後一切都變得夢幻，好似 slowmotion，難以至信。然後坐下食早餐，他告知我們的父母已在香港機場等候，我就開始不停流淚，才意識到一切都是真的。
記：最後埋單幾錢？
Akshay：哈哈，很多錢。
Trisha跟Akshay經已順利完婚，據知航空公司最後只收咗兩個頭等艙客位嘅價錢。不過講明，求婚服務本來並唔包括喺服務範圍，航空公司幫唔幫你就要睇你誠意同造化啦。
資料來源:香港蘋果日報
